«Ұлттық кітап күні» апталығы аясында бүгін бізде ерекше әрі мазмұнды жүздесу өтті! Заманауи қазақ әдебиетінің жарық жұлдызы, Халықаралық Алаш сыйлығының иегері және балалардың сүйікті жазушысы Айзат Рақышпен «Сәлем, оқырман!» атты онлайн кездесу ұйымдастырылды. Іс-шараға Қостанай қаласының жас кітапсүйер қауымы – №11 жалпы білім беретін мектептің 6 «Ә» және №17 мектептің 5 «Ә» сынып оқушылары белсене қатысты.
Кездесу өзегі жазушының «Қиялым, самға, шарықта» атты хикаяты болды. Оқушылар шығарманың кейіпкерлерімен бірге арман әлеміне саяхат жасап, туындының тәрбиелік мәні мен мазмұнын тереңнен талдады.
«Балалар әдебиеті – болашақтың іргетасы». Айзат Рақыштың шығармалары жас буынды биік армандарға жетелейтініне тағы бір мәрте көз жеткіздік. Оқырмандар өздерін қызықтырған сұрақтарын қойып, жазушыдан шығармашылық шабыт алды. Кітапқа деген құштарлық осындай кездесулерден басталады!
