Қазақстанның тарихи-мәдени мұрасын кеңінен насихаттау аясында жоғары оқу орнының студенттері «Ғасырлар даналығы: Ясауи мұрасы» атты іс-шарада философия мен руханияттың тереңіне бойлап, ерекше танымдық тәжірибе алды.

«Қатысушылар үшін орта ғасырлық ой-пікір әлеміне «Тарих» мамандығының 3-курс студенті Үсенов Санжар Ақылбекұлы және 1-курс студенттері Максим Топоров, Досова Дильназ бен Алексеева Анастасия жолбасшы болды.»

Студенттер белсенді түрде пікір алмасып, философиялық еңбектерден үзінділерді талдады, күрделі сұрақтарға жауап берді. Сондай-ақ Ұлы дала халықтарының өзіндік санасын ғасырлар бойы қалыптастырған рухани құндылықтарды жаңаша пайымдады.

Іс-шара барысында қазіргі заман мен болашақ мәселелеріне де ерекше назар аударылды. Қожа Ахмет Ясауидің ілімі XXI ғасырда қалай көрініс табады? Оның адамгершілік пен адалдыққа негізделген сопылық философиясы қазіргі ұрпақтың құндылықтарын қалыптастыруда қандай рөл атқарады? Жаһандану дәуірінде ұлттық бірегейлікті, мәдени кодты және тарихи тамырларға деген құрметті сақтауға не көмектеседі?

Бұл сұрақтар болашақ мамандарды тарихқа терең бойлап қана қоймай, мәдени мұраны сақтау мен оны келер ұрпаққа жеткізудегі жеке жауапкершілігі туралы ойлануға жетеледі.

Іс-шара соңында әрбір қатысушы өз ойын жинақтап, «Болашаққа жолдауын» жазды.

Студенттер өз жазбаларында бүгінгі түйген ойларымен бөлісіп, ата-баба даналығын қазіргі әлемде дәріптеу жолдары туралы рухани көзқарастарын білдірді.