|
Республикаға танымал мәртебесі жоғары жалғыз «Айгөлек» балалар журналы жыл сайын дүркіретіп «Айгөлектің достары» фестивалін өткізеді. Елеусіз балалардың еңсесін көтереді. 26 наурыз күні республикалық оқушылар сарайында фестивальға шығармашылық жетістіктері үшін республиканың 14 облысынан келмеген бала жоқ. Бәрі-болашақ «мен - қазақпын!» дейтіндей намысты, жігерлі жеткіншектер. Осындай талапты оқушының бірі Ардақ Кенжеахметова да «Айгөлектің достары - 3» фестиваліне делегат ретінде қатысып қайтты. Ардақ Қостанай қаласындағы Ы. Алтынсарин атындағы дарынды балаларға арналған мектеп-интернатының 9 сыныбында оқиды. Өзі осы мектептегі елімізге танымал ақын, белгілі айтыскер Әсия Беркенованың «Жас ақындар» үйірмесіне қатысып, дәріс алады. Бойына шымыр да орамды нәр жинап, тілге жеңіл, жүрекке жылы тиетін өлеңдері республикалық журналдарда, «Айгөлекте», облыстық «Жас қазақ» - қазіргі «Алға» жастар журналында жарық көрді.
«Айгөлек» журналының бас редакторы Қымбат Әбілдақызы әр оқушыны дүйім жұрттың алдына шақырып, «Мына бала осындай облыстан, мынандай өлең, әңгіме жазады өзекті сұрақтар, өтініштер қойып, ауылының мектебінің мұң - мұқтажын айтады. Озат оқушы, пәленбай байқаудың жүлдегері» деп таныстырғанда бір түрлі болады екенсің. Ол кісінің сенімен терезесі тең адамдай әңгімелескеніне, бауырына тартып құшақтап, бетіңнен сүйгеніне ешбір теңеу таба алмаймын.
Фестиваль аясында балғын балалардың құшақтары гүлге толып, мақтау қағаздарымен марапатталып, сыйлықтар алыпты. Ал, суретші балалардың «Айгөлектің суретшілерімен ойнамаңыз!..» атты көрме ұйымдастырылды. Балалар Алматы қаласының көрікті жерлерін аралап, Ғ. Мүсірепов атындағы жастар театрында болып, спектакль тамашалапты. «Айгөлектің» жас тілшісі, жас суретшісі» деген куәліктер де тапсырылыпты. Солардың қатарында жас талапкер Ардақ Кенжеахметова да бар. Және де Ардақ «Айгөлектің жас тілшісі» деген құрметті атаққа Қостанай қаласынан бірінші оқушы.
|
|
