Бүгін Ыбырай Алтынсарин атындағы балалар мен жасөспірімдер кітапханасының қабырғасында 10–11 сынып оқушыларына арналған жарқын әрі креативті іс-шара өтті. Оқушылар қазақ тіліндегі жаңа әдебиеттермен танысып, кейін өздерін нағыз агенттік ретінде сезініп, шығармаларды жастар аудиториясын қызықтыратындай етіп жарнамалап көрді. Бұл үшін әлеуметтік желілерге арналған тартымды тақырыптар, қазіргі заман кейіпкерлерімен байланысты тосын шешімдер және бүгінгі қоғамда сұранысқа ие болуы мүмкін киім үлгілерінің идеялары ұсынылды.

Жобаларды қорғаудан кейін қатысушыларды мазмұнды да қызықты интерактивті бөлім қарсы алды: әдеби кейіпкерлерді бейнелеуге арналған «Крокодил» ойыны және шығармаларды табуға бағытталған ребустар ұсынылды. Іс-шараның атмосферасы ерекше серпінді, әсерлі әрі шабытқа толы болды. Бұл кездесу тағы бір мәрте дәлелдеді: классика – жалықтыратын дүние емес. Ол – уақыт өткен сайын құнын жоғалтпайтын, әр дәуірмен үндесіп, адам жанына әсер ететін терең эмоциялар мен мағыналар әлемі.

Биыл «Бірге – денсаулыққа. Бірге – ғылыммен» ұранымен ұйымдастырылған Дүниежүзілік денсаулық күні аясында «Денсаулық формуласы» атты тренинг элементтерімен толықтырылған мазмұнды әрі әсерлі интерактивті кездесу өткізілді.

№19 мектептің 8-сынып оқушылары физикалық және психикалық саулықтың маңызды мәселелерін жоғары деңгейдегі маманмен талқылау мүмкіндігіне ие болды.

Профилактикалық әңгіме жүргізу үшін Хакимова В.Б. шақырылды — ол жай ғана психолог емес, психология ғылымдарының магистрі әрі Халықаралық әлеуметтік психотерапевтер қауымдастығының мүшесі.

Сонымен қатар, Қостанай облысы Аналар кеңесінің өкілі Жұмасұлтанова Жадыра Өмірбекқызы қатысып, отбасы мен қоғамдағы салауатты қарым-қатынастың адамгершілік қырларына тоқталды. «Қазіргі қоғамдағы денсаулық — бұл физикалық жағдай мен ішкі тыныштықтың үйлесімі. Ғылым бізге осы тепе-теңдікті табуға мүмкіндік беретін құралдар ұсынады», — деп атап өтті спикерлер.

Балалар кітабы апталығы аясында Қостанай қаласындағы №24 мектеп-гимназиясының 3–4 сынып оқушыларына арналған, ұлы ағартушы Ыбырай Алтынсариннің өмірі мен шығармашылығына негізделген «Баға жетпес құндылықтар болады» атты танымдық квест-ойын ұйымдастырылды. Іс-шара барысында оқушылар ерекше қызығушылық танытып, уақыттарын мазмұнды әрі әсерлі өткізді. Сонымен қатар, олар қазақтың көрнекті ағартушысының мұрасы туралы білімдерін тереңдете түсті. Квест барысында қатысушылар төрт кезеңнен тұратын сынақтардан өтті. Әр бөлім өзіндік мазмұнымен ерекшеленіп, тарих пен сауаттылықты, шығармашылықты, халық даналығын және тапқырлықты қамтыды. Оқушылар берілген тапсырмаларды орындап, сұрақтарға жауап беріп, жұмбақтарды шешу арқылы әр кезеңде арнайы кілттерге ие болды. Жиналған кілттер олардың алған білімдерінің нышанына айналып, ойын соңында қатысушыларды білім мен даналыққа бастар символдық есікке жетеледі.

Квизотека: Нейрошторм

Нейрожелілер мен жасанды интеллектке арналған квизотека — әсерлі өтті! Қатысушылар болашақ технологиялар әлеміне терең бойлап, өз білімдері мен тапқырлықтарын сынады. Жылдам ойлау, тың идеялар мен күтпеген жауаптар ойынға ерекше серпін берді. Ал кей сәттерде бәрі бірдей: «Тоқта, бұл анық қой!» — деп таңданысын жасыра алмады.

Жеңімпаздар анықталды, бірақ ең бастысы — бәрі миын шыңдап, нағыз AI-вайбты сезінді.

Барша қатысушыға алғыс айтамыз!

Ойынның нәтижелері:

1 орын – АДД Птахи
2 орын - Культ Мифического Рассвета
3 орын - Биполярность

Келесі ойында кездескенше!

2 сәуір — Халықаралық балалар кітабы күніне орай заманауи балалар әдебиетінің көрнекті өкілдерінің бірі, беделді әдеби сыйлықтардың («Заветная мечта», «Книгуру», Вл. Крапивин атындағы сыйлық, С. Маршак атындағы сыйлық, Балалар мен жасөспірімдер әдебиеті жөніндегі халықаралық кеңестің Андерсен дипломы) лауреаты Станислав Востоковпен онлайн-кездесу өтті.

Облыстық балалар мен жасөспірімдер кітапханасының қонағы ретінде №3 мектеп-гимназиясының 8-сынып оқушылары қатысты. Оқушылар Станислав Владимировичке көптеген қызықты сұрақтар дайындады: оның Дж. Даррелл негізін қалаған Джерси аралындағы табиғатты сақтау орталығындағы білімі мен жұмысы туралы, шығармашылығы жайлы, Мәскеу маңындағы ауылда өткен өмірі, болашақ әдеби жоспарлары туралы сұрады. Тіпті балалар ата-ананы қалай жақсы тәрбиелеуге болады деген ерекше сұрақ та қойды.

Кездесуден кейін жазушының өз шығармаларын қалай тудыратыны, оның кітаптарында неге сан алуан жануарлар бейнеленетіні және қоршаған орта тіршілігін өте шебер, әсерлі сипаттайтыны айқын болды.

Шын жүректен: «Рақмет сізге, Станислав Владимирович! Бізбен сұхбаттасуға келіскеніңіз — үлкен бақыт!» — деп айтқымыз келеді.

Ыбырай Алтынсарин атындағы ОБЖК «Алау» ТРК-мен бірлесіп «Не оқуға болады?» атты жобаны дайындады. 

Василий Андреевич Тропинин (1776–1857) — орыс кескіндемешісі, романтизм бағытының өкілі, Мәскеудің ірі портрет шебері, Императорлық көркемөнер академиясының академигі. Оның шығармаларын назарларыңызға ұсынамыз.

Биылғы «Бір ел – бір кітап» акциясы үшін белгілі қазақ жазушысы Қабдеш Жұмаділовтің «Тағдыр» тарихи романы таңдалды.
Кітап 1989 жылы жазылған, бірақ ол тарихи роман болғандықтан, тақырыбы ескірмейді, керісінше, әрқашан қызығушылық тудырады.

Өйткені, халықтың тағдыры, басынан өткерген ауыр оқиғалар ерекше күйзеліспен көрсетілген.

Қабдеш Жұмаділов 1936 жылы 24 сәуірде Қытай Халық Республикасында Шыңжаң өлкесінің Тарбағатай аймағы, Малдыбай ауылында дүниеге келген. Найман тайпасы Төртуыл руынан шыққан.

 Ауылда бастауыш білім алып, кейін Шәуешек гимназиясын бітіреді. 1956 жылы Қытай үкіметінің жолдамасымен Алматыға келіп, Қазақ мемлекеттік университетінің филология факультетіне оқуға түсті. Алайда университеттің екінші курсынан кейін екі ел арасындағы саяси жағдайға байланысты кері шақырылып, 1958–1962 жылдар аралығында Қытайда қуғын-сүргінге ұшырады. 1962 жылы, Қытай шекарасын бұзып өткен қазақ көшімен бірге атамекенге қайтып оралып, ҚазМУ-дегі аяқталмай қалған оқуын қайта жалғап, 1965 жылы бітіріп шықты.

Жазушы өмірінің елеулі кезеңдері:

1944-1947 жылдар. Өз әкесі салдырған Сібетідегі бастауыш мектепте оқыды.

1949-жыл. Шәуешектегі жеті жылдық қазақ мектебіне оқуға түсті.

1952-1956 жылдар. Шәуешек гимназиясында оқыды.

1954-жыл. Үрімшіде шығатын «Шыңжаң газетінде» алғашқы өлеңі жарық көрді.

1956-жыл. «Шұғыла» журналының бірінші нөмірінде «Жамал» атты тұңғыш әңгімесі басылды.

1956-1958 жылдар. Қытай үкіметінің жолдауымен Алматыға келіп, Қазақ ұлттық университетінің физика факультетінде оқыды.

1958-1962 жылдар. Қытайда саяси қуғын-сүргінге ұшырады.

1962-жыл. Шынжаңнан ауған қалың көштің бұйдасын ұстап, атажұрт Қазақстанға қайтып оралды.

1962-1965 жылдар. Алматыдағы оқуын қайта жалғастырып, Қазақ Мемлекеттік университетін бітіріп шықты.

1965-жыл. Өзімен тағдырлас Самал Әукенқызына үйленді.

1965-1967 жылдар. «Қазақ әдебиеті» газетінде қызмет істеді.

1967-1976 жылдар. «Жазушы» баспасының проза бөлімінде аға редактор болды.

1976-1981 жылдар. Мемлекетгік Баспасөз комитетінде қызмет атқарды.

1981-жыл. Кеңсе қызметін тастап, бірыңғай шығармашылық жұмысқа көшті.

1983-жыл. «Соңғы көш» романы үшін жазушыға М. Әуезов атындағы әдеби сыйлық берілді.

1989-жыл. Жазушы арада отыз жыл өткенде Шынжаңға сапар шегіп, ата қонысын аралап қайтты.

1990-жыл. Қ. Жұмаділовке «Тағдыр» романы үшін Абай атындағы Мемлекеттік сыйлық берілді.

1996-жыл. Жазушының 60 жасқа толған мерейтойын республика жұртшылығы салтанатпен атап өтті.

1998-жыл, 23-қазан. Президент Нұрсұлтан Назарбаевтың жарлығымен Қабдеш Жұмаділовке «Қазақстанның халық жазушысы» деген құрметті атақ берілді.

«Тағдыр» романына 1990 жылы Абай атындағы Мемлекеттік сыйлық берілді.

2021 жылы Қабдеш Жұмаділов өмірден озды.

Экскурсия – жаңа ортамен танысып, дүниетанымды кеңейтетін, мәдени көкжиекті байытатын мүмкіндік. Осындай мазмұнды кездесуді кітапхана қызметкерлері КИПК студенттеріне ұйымдастырды. Жастар кітапхананың әр бөлімін аралап, жаңа әдебиеттермен танысты, пайдалану ережелері мен жұмыс тәртібі туралы мағлұмат алды. Олар көркем әдебиеттің жанрлық алуан түрлілігімен, ғылыми-көпшілік басылымдардың оқу үдерісіндегі маңызымен танысып, кітапхананың тек оқу орны ғана емес, сонымен қатар түрлі танымдық шаралар мен зияткерлік ойындар өтетін рухани орталық екенін білді.