Әр адамның өз алар асуы болады. Дегенмен, әрқайсысы ол туралы терең ойлана бермейді, тек өмір жолының соңында ғана өткенге көз салып, босқа кеткен уақыт үшін өкініш білдіреді. Өз ісіне бар ғұмырын арнап, аянбай еңбек ететіндер де болады. Сондай адамдардың бірі... Нұрсұлтан Әбішұлы Назарбаев. Сондықтан да осындай елбасымызды біздер, қазақстандықтар мақтан тұтамыз, елін болашаққа сеніммен бастайтын, біртұтастықты, татулықты ту етіп, халық тәуелсіздігін ту етіп көтерген тұлғаның беделін Қазақстаннан басқа елдер де мойындап отыр.
Ы. Алтынсарин атындағы Облыстық балалар мен жасөспірімдер кітапханасында апта бойы Тұңғыш Президент Күніне арналған іс-шаралар өтуде. 26, 27, 28 қарашада Қостанай медициналық колледж студенттері, № 1, 2, 14, 21 мектептерінің жоғары және 6-7 сынып оқушылары Тұңғыш Президент Мұражай бойынша виртуалды саяхат жасап, «Тұлға және саясат келбеті. Ұлт көшбасшысы» портрет кеші мен «Елбасы және тәуелсіздік» кешіне қатысты, оның ел басқаруда қол жеткізген жетістіктері туралы сөз қозғады. Әрине, балалар елбасының қарапайым өмірде, жақын туыс-туғандарының ортасында қандай екенін білгісі келіп қызығушылық білдірді. Себебі, ол біреулер үшін Президент болса, кейбіреулер үшін қуана да, уайымдай да білетін, алға жетелер арман-мақсаты бар қарапайым адам. Қалай десек те, Нұрсұлтан Әбішұлы Назарбаевты миллиондаған адам жақсы көреді, оның қолын қысуды армандап, еліміздің кемел болашағын елбасы есімімен байланыстырады.
