Жуық арада көптен күткен керемет мерекені қарсы аламыз. Ойын мен күлкіге, сиқыр мен сыйлыққа толы бұл мейрам әр шаңыраққа шаттық әкеледі. Ал кітапханадағы жаңа жылдық мереке шырқау шегіне көтерілді!
28-желтоқсанда Ы. Алтынсарин атындағы облыстық балалар мен жасөспірімдер кітапханасында «Қиыр шалғайдағы жаңа жылдық оқиға…» атты балаларға арналған ертеңгілік өтті, оған кішкентай оқырмандарымыз бен қызметкерлердің балалары қатысты. Үш құлыппен жабылған сиқырлы сандықты табу үшін балалар орман, тау, теңізден өтіп, қиыр шалғайға сапар шегіп, күтпеген кездесулер мен сиқырға толы жаңа жылдық ертегіге тап болды.
Балалар бастарынан не кешпеді десей, Теңіз Патшайымының еркелігі, Мыстан кемпірдің қитұрқы қылықтары және Соловей қарақшының бұзақылығы... Бірақ балалар еш қорықпастан, қаймықпастан үш кілтті тауып, сиқырлы сандықты ашты, ал оның ішінде … ха, бұлай болар деп кім ойлаған! … Әрине, Аяз Ата сыйлықтары: тәттілердің түр- түрі: бал татыған пряниктер, мармеладтар мен шоколадтар.
Бірақ… достар тоқтай тұрыңыздар, жаңа жылдық оқиға бұнымен аяқталмайды! Кітапханада 3қаңтар күні кездесеміз! Таң атқаннан кеш батқанға дейін тосынсыйлар, көңілді байқаулар, жылы сөздер және басқа да керемет сыйлықтар сіздерді күтеді. Жаңа жылдарыңызбен!!!
